ភ្នំពេញ៖ ក្រសួងមហាផ្ទៃបានបញ្ជាក់ថាច្បាប់កម្ពុជាបានការពារនូវសិទ្ធិរបស់អ្នកបោះឆ្នោត ហើយគ្មានអ្នកណាម្នាក់ ឬគណបក្សណាអាចគំរាមកំហែងដល់អ្នកបោះឆ្នោតបាននោះទេ ដោយបានប្រកាសធានានូវការងាររបស់អ្នកបោះឆ្នោតដែលជាសមាជិកក្រុមប្រឹក្សាឃុំសង្កាត់ផងដែរ។

ការបញ្ជាក់នេះគឺបន្ទាប់ពីមានគណបក្សមួយដែលក្រសួងមិនបញ្ចេញឈ្មោះតែទំនងសំដៅដល់គណបក្សភ្លើងទៀនដែលក្រសួងសង្កេតឃើញថា បានធ្វើសកម្មភាពបង្ខិតបង្ខំឱ្យសមាជិកក្រុមប្រឹក្សាឃុំ សង្កាត់ ដែលជាអ្នកបោះឆ្នោត ឱ្យបោះឆ្នោតជូនគណបក្សនយោបាយដែលខ្លួនតម្រូវ។ មិនតែប៉ុណ្ណោះថែមទាំងគំរាមកំហែងដល់អ្នកបោះឆ្នោតថា ប្រសិនមិនបោះឆ្នោតឱ្យនឹងប្រឈមការបណ្តេញចេញពីសមាជិកគណបក្ស នឹងដកតួនាទីពីសមាជិកក្រុមប្រឹក្សាឃុំ សង្កាត់ថែមទៀត។

ករណីនេះក្រសួងបានលើកឡើងថាការបង្ខិតបង្ខំ គំរាមកំហែង ដល់អ្នកបោះឆ្នោត គឺជាការរំលោភបំពានដល់សិទ្ធិសេរីភាពរបស់អ្នកបោះឆ្នោតនៅក្នុងការសម្រេចចិត្តបោះឆ្នោត ជ្រើសតាំងសមាជិកព្រឹទ្ធសភាដែលធានាការពារដោយរដ្ឋធម្មនុញនៃព្រះរាជាណាចក្រកម្ពុជា និងច្បាប់ស្តីពីការបោះឆ្នោត ជ្រើសតាំងសមាជិកព្រឹទ្ធសភា ព្រមទាំងច្បាប់ និងលិខិតបទដ្ឋានគតិយុត្តពាក់ព័ន្ធ។

ក្នុងសេចក្ដីប្រកាសព័ត៌មានចុះថ្ងៃទី១៥ ខែកុម្ភៈ បានបញ្ជាក់ថា៖ «ការផ្លាស់ប្ដូរសមាជិកក្រុមប្រឹក្សាឃុំ សង្កាត់ ក្រសួងមហាផ្ទៃតែងធ្វើការអនុវត្តស្របតាមច្បាប់ និងលិខិតបទដ្ឋានគតិយុត្តិមានជាធរមាន»។

ក្រសួងបានអំពាវនាវដល់គណបក្សនយោបាយដែលបានចុះបញ្ជីត្រឹមត្រូវស្រប តាមច្បាប់ស្តីពីគណបក្សនយោបាយ អនុវត្តឱ្យបានត្រឹមត្រូវតាមច្បាប់ និងលិខិតបទដ្ឋានគតិយុត្តជាធរមានដើម្បីធានាឱ្យការបោះឆ្នោតប្រព្រឹត្តទៅដោយសេរី ត្រឹមត្រូវ និងយុត្តិធម៌ ស្របតាមគោលការណ៍លទ្ធិប្រជាធិបតេយ្យ សេរីពហុបក្ស ដូចមានចែងក្នុងរដ្ឋធម្មនុញ្ញនៃព្រះរាជាណាចក្រកម្ពុជា៕